1900-იან წლებში შემუშავდა ე.წ. ზედა თბილისის განაშენიანების გეგმა და ქუჩათა ქსელი, რომელიც „ქვედა თბილისს“ სამთო ტრამვაით – ფუნიკულიორით დაუკავშირდა. ფუნიკულიორის პირველი რეკონსტრუქცია 1936-1938 წლებში ჩატარდა და დაძველებული ზედა სადგურის ადგილას ახალი აშენდა (ავტორები: ზ. და ნ. ქურდიანები, თანაავტორი: ა. ვალაბუევი). შენობაში ფუნქციონირებს რესტორანი.

იცოდით თუ არა, რომ...

1. XIX საუკუნის დასაწყისიდან მთაწმინდის რაიონი და მისი მიმდებარე ტერიტორია თავადი გაბაშვილების სამფლობელოდ ითვლებოდა. ამ პერიოდში საქართველოში ჩამოვიდა ილია ჭავჭავაძის მეგობარი ივანე პოლტარაცკი. მან ცოლად შეირთო ნადეჟდა გაბაშვილი, სწორედ იმ გაბაშვილების შთამომავალი, რომლის ოჯახსაც ეკუთვნოდა მთაწმინდის პარკის ტერიტორია. აღსანიშნავია, რომ გაბაშვილებს და პოლტარაცკებს მთაწმინდის პარკის და ფუნიკულიორის დაარსებაში მნიშვნელოვანი წვლილი მიუძღვით.

2. ფუნიკულიორი 1905 წლის 27 მარტს გაიხსნა. მას ნიკო ფიროსმანმა დიდი ფერწერული ტილო მიუძღვნა.

3. მგზავრობის პირველი მსურველების წასახალისებლად, ფუნიკულიორის მფლობელმა ბელგიურმა ანონიმურმა საზოგადოებამ საკმაოდ სოლიდური თანხა გამოყო მათთვის, ვინც ვაგონს მთაწმინდაზე აჰყვებოდა და ჩამოჰყვებოდა.

4. ფუნიკულიორის გზის სიგრძე 501 მეტრია. ვაგონში 60 ადამიანი ეტევა.